شوية غزل … على عجل
وينِكْ…؟
لما الحلو بغيب، بغيب القمر
بتتخربط الإيام وبيقسى السهر
ولما الحلو بعود، بعود القمر
يضوي على العشّاق، وبيحلى السهر
...................
وينِك يا حلوي وينك
زهّر نوار
دليني على بيتك ع أحلى دار
تركتي هيك وفلّيتي من دون إنذار
انا الشوق ملوّعني وقلبي ع نار
صرلي جمعة عم دوّر ليلي ونهار
وبركض من حقلي لحقلي قطّف أزهار
لَ قدّمها للحلوي لمنّا بغار
الورد الجوري والنرجس الفل الجلنار
.................
وينك يا حلوي وينك كلّي انتظار
طوّلتي الغيبي عليّي وطال المشوار
دخلِك خبريني وينك وقولي شو صار
بيني وبينك خبريني شو يلّي صار
تركتي هيك وفلّيتي من دون إنذار
والنوم من بعد فراقك من عيوني طار
تركتي هيك وفلّيتي ومن راسي طار
عقلي، ومن دونك انا ضايع محتار
رجعي يا حلوي رجعي، كلي انتظار
للحظة الشوفك فيها وانسى اللي صار
وضمّك لْصدري وقلك، زهّر نوار
الورد الجوري والنرجس وكل الأزهار
عودي لدياري عودي بتحلى الأنوار
وبتقلّك أهلا وسهلا عتبات الدار…
حنا حبيب فرحة
دبي-حدائق جبل علي-15/12/2003
إعادة:23/8/2024
شوية غزل … على عجل
From Facebook