أغنية التفاحة…! رحت عالسوبر ماركت مبارح ت أشتري بردقان للعصير، دخلت الى قسم بيع الخضرة والفواكه، المكان مليء بالسيدات … اليكم تسجيل لبعض السيدات عن غلاء الاسعار…
واحدة تنظر الى سعر البندورة والخيار وتصرخ :نحنا بلد البندورة والخيار … يا عمي شو هالاسعار … نار … نار!
واحدة تطلعت بسعر الكوسى وقالت:طبخة الكوسى لعيلة من خمس أشخاص صارت تكلف مع اللحمة والرز اكثر من تنين مليون … وين عدلك يا ربي؟
سيدة أخرى عم تتنقل بالمحل وتطلع عالاسعار وتبربس:الله لا يوفقهم … يا ناس، لوين رايحين واجمل من الكل ست عم تتأمل سعر التفاح وتقول :انت يا آدم سبب مصايبنا … لو ما نتشت هالتفاحة وبقيت فوق ما كان أفضل… ساعتها قعدت عَ جنب وكتبت اغنية للتفاحة قلت فيها: يا تفاحة … يا تفاحة شو جابك عَ هالساحة كنت بأسمى محل بالسما عايشي عالشجرة مرتاحة قطفِك آدم وقرط كدشي وتدركب من دون مناحة وهللأ إنتِ يا تفاحة علقاني ببلد الوقاحة السياسيين حرامية وتجار والحكومي ببيت الراحة… والله يعين حنا حبيب فرحة 12/1/2026