عامود السما
هذا هو لبنان أنطون سعادة
بقلم "مختار الزجل اللبناني الشاعر الكبير عجاج المهتار…
وبيسألونا منين -جينا-محاربين
وليش عن لبنان -صرنا- مدافعين
قلنالهم عنا -العقيدة-واضحة
قلب الوطن-لبنان-والحصن الحصين…
لبنان، راس النبع، فالش عالدني
روح الرسالة، وقلب. هالجسم الغني
ع صخرتو ملوك البسيطة بتنحني…
وتحطّمو عليها مخوخ الفاتحين…
لبناننا :النسر المحلّق بالفضا
زند البطوله، وسيفها وحكم القضا
حضن المحبة الشاملة، وعين الرضا
مش "قن"ومغارة لصوص ومجرمين…
لبناننا : حصن الكرامة والهدى
وخندق جنود الحق ورجال الفدى
وغيرنا "للحرب" ما بيّن حدا
وما منتركو-مرعى حمير-الغاصبين
لبناننا : مش بُغض رجعي طايفي
ولا سموم بنفوس الأهالي طايفه
لبنانا روح المحبة الطايفة
وترياق شافي عالشمال وعاليمين…
لبنان إلنا، وهيك بدنا نكوّنو
بدماتنا وزهر الفدا - منلذنو
والارز بهلال الفلك - منصونو
تيظل -عامود السما-عالي الجبين
ونحنا نذرنا للجهاد وجودنا
ونفوسنا ورواحنا وزنودنا
وصار الوطن بقلوبنا- معبودنا-
عالشهادة الصادقة حلفنا يمين
عرزالنا عجبين صنين انحفر
من قلب كشحاتو لمع ضو القمر
وبلادنا -زواويد-عم تعطي البشر
خمر وعسل … وفكار تقري الجايعين…
من "الزوادة " لعجاج المهتار
ما في أحلى من انك تشارك عجاج المهتار"بزوادتو، إذا بعدك ما تروقت … اترويقة معو بتعبي المعدة والراس…
حنا حبيب فرحة
17/5/2025
عامود السما
From Facebook