التبّولة…!
من كتاب" المئة وصفة ووصفة"لحنا حبيب فرحة غير المطبوع حتى الساعة، إخترت لكم وصفة "التبولة"… جربوها بهالطريقة وخبروني، وإذا حبيتوا فيكم تعزموني … منبدا:
مشغولي مشغولي
عم تعمل تبولي
جاي لعندا الاسمر
والليلي رح تسهر
سهرا مهولي…
بتبدا القصة من الدكين
الخُضرتا طازة يا زين
وتَ تعملي أطيب صحن
تبولي ومش كبف ما كان
من البقدونس بس ضمتين
ومن النعنع ضمي او نص
من البندورة اربع روس
يكونو وسط وحلوين
من البصل بيكفيكي راس
ون كان أخضر شي ضُمّي
وزيت طيّب شي فنجان
أصلي من صنع لبنان
وبرغل ناعم شي كمشي
ما تنسي شغل زحلي
من الملح ملعقة زغيري
من الحامض تنتين تلاتي
حطي لمكونات عا جنب
وتحضري لَ أطيب ضرب…
إبدي بهرم البقدونس
والنعنع دورو بعدين
وما تنسي تديري بالك
حتى يكون ناعم هرمك
غسليهم كتير منيح
وحطيهم بالمصفايي
تتروح عنهم كل المي
بعدين قطعي الطماطم
ناعمي وما تكون كبيري
وحطيها بْقدر التحضير
هرُمي البصل
زيدي البرغل
عصُري الحامض
وحطي النعنع والبقدونس
فوق الكل
رشّي الملح
صبّي الزيت
حركي الخلطة كتير مليح
وقدميها لزوارك
او لزوجك وولادك
والف صحتين على قلبك
وقلب الكل…
حنا حبيب فرحة
27/1/2025
التبّولة…!
From Facebook