يا حلالي … ويا مالي
من أهم وأجمل الأغنيات التي كانت تغنى بالأعراس في جديدة مرجعيون هذه الأغنية التراثية الجميلة "يا حلالي ويا مالي"… إحتفظت بالعنوان وابتدعت القصة بهذه الكلمات … وانا جاهز لتقديمها الى أحد المطربين الذي يقدر قيمتها ويلحنها ويغنيها…
واليكم القصيدة…
يا حلالي ويا مالي ويا رَبعي ردّو عليِّ
(الكورس) يا حلالي ويا مالي
يا حلالي من حلاه وعيونا السود مكحّلا
يا حلالي ويا مالي
كنت واقفي عالبلكون سارحة بهالدنيِ الجنّي
يا حلالي ويا مالي
وفجأة هجموا شباب الحي وكبَّلولي إيديّي
يا حلالي ويا مالي
رميت حالي من ورا الشير وطل الظابط عليّي
يا حلالي ويا مالي
هربت منو وتخبيت بين زهرات الريحاني
يا حلالي ويا مالي
لحقني على البستان وقطّف زهرات حلياني
يا حلالي ويا مالي
ومسكني وربّط إيدَيْ بياسمين حقل البستان
يا حلالي ويا مالي
وشكّل شعري بزهرة حب بيضا صنع الرباني
يا حلالي ويا مالي
وضمْني وقبّلي خدودي وقلّي يللا يا حناني
يا حلالي ويا مالي
إمشي عالجامع عالدير وما تقولي "كاني ماني"
يا حلالي ويا مالي
حبنا نقي متل المي الخلقا الرب العالي
يا حلالي ويا مالي
ومعو ما تردّدتْ ومشيت لَعند قاضي الزماني
يا حلالي ويا مالي
ومتل حبيبين حلوين طلبوا بركة العالي
يا حلالي ويا مالي
ودخلنا عَ قفص الحب تَ نبني البيت الهاني
يا حلالي ويا مالي
وركضوا الناس علينا تَ يقدمولنا التهاني
يا حلالي ويا مالي
ويتمنولنا نعيش العمر بحب وثقة وتفاني
يا حلالي ويا مالي
والعاقبي لَكل العُزاب الناطرين بالصف التاني
يا حلالي ويا مالي
يا حلالي ويا مالي ويا رَبعي ردوا عليي…
(الحقوق محفوظة…)
حنا حبيب فرحة
عين عار
14/1/2025
يا حلالي … ويا مالي
From Facebook