يا الله شو مشتاق … (تتمة-3) -------------------------- يا الله شو مشتاق للعم جوزف وحماماتو وارانبو وجاجاتو العاشو بخان الدار… يا الله شو مشتاق لدَوْرَس "الزنوبا" لكان لبو دريد جار نركب ورا هالثور يلف يلف ويدور ونحنا معاه ندور ت يخلص المشوار… يا الله شو مشتاق للنومي بلعرزال مع وائل وآمال ومفيد عبلا وسمير… للنزهة عالبوليفار مع حسّان وفؤاد وطارق ابو سمرا ووليد وزين واسامة وعيد، يا الله شو مشتاق ل أجمل السهرات مع يوسف الاشقر المعروف بأبو محمود بعدين وِعي وغيّر لما إجاه داوود تحوّل لبو داوود… يا الله شو مشتاق للرقصة بعد الكاس وغناية اللوممبا ول أطيب الاكلات من أجمل الديات ديات ام يوسف ووجّا البشوش ع طول تستقبل الشباب أصحاب يوسف وعيد والبسمة ع وجّا رطال بسمة رضا وإيمان يا الله شو مشتاق… (يتبع) حنا حبيب فرحة 29/4/2019 لتوضيح بعض الامور التي وردت في هذه الذكريات : - عمي جوزف فرحة كان يربي ارانب ودجاج وحمام في خان الدار في الجديدة… - الدورس :كان المرحوم جميل زنوبا، يدرس القمح بهذه الطريقة … ينقي القمح من السنابل … يفلش على قطعة من الارض سنابل القمح اليابسة، ويربط لوحة من الخشب بالثور، نجلس عليها فرحين، والثور يلف ويدورونحن ندور معه … وكان بيته قريبا من منزل المرحوم كامل ابو شقرا، ابو دريد ووائل واسامة…
- العرزال: عمّرنا عرزال بالقرب من بيت وائل ابو شقرا، انا ووائل وآمال حوراني ومفيد عبلا وسمير سويدان - حسان حليم جبارة وفؤاد اللببدي الحداد، وطارق ابو سمرا ووليد غلمية وزين بركات واسامة ابو شقرا - يوسف الاشقر: كان اسمه الغالب قبل ان يتزوّج، ابو محمود … وبعدما تزوج وأنجب داوود. صار ابو داوود … كان رحمه الله بعد كم كاس، يربط حبلة بالكراسي ويصير يفز فوقها ويغني:تشومبي تشومبي … لوممبا…
اما والدته ام يوسف، فكانت رحمها الله، تحضر لنا أطيب مازة، وتروح وتجي وهيي ترحب بنا بسرور واضح… حنا حبيب فرحة 30/4/2019