يا الله شو مشتاق…
يا الله شو مشتاق
لجديدتي الحلوي
والجني من حولي
لَ أهلها الطيبين
للساحة للأسواق
للأهل للأصحاب
لجنينتي خلف الباب
للرفش للمنكوش
لَ دقّة المهباج
عند الصبح بكير
للصاي للطربوش
للزلم لكانو زلم
واليوم المِتلن حلم
يا الله شو مشتاق
لهمدرة لوجاق
المترئس الصالون
ملهلب متل بركان
يوزع دفا وسرور
والناس من حَولو
تحكي قصص وخبار
حكايي ورا حكايي
نهفي ورا نهفي
وبينهم رجل ختيار
وجودو هنا وبَرَكي
أحلى الكلام يحكي
كلو حِكم ومثال
جبار شو جبار
ما فيك ما تسمعلو
نكنت شب او ختيار
"الدفا عفا يا ناس"
وحطبي ورا حطبي
يوقد يحرْك النار
وطابة بزر زيتون
طابي ورا طابي
طابة جفت وعيدان
والطقس برا زمهرير وبرد
التلج نازل من السما قنطار
ويصيح شيخ الدار
ما حدا يحرك
رح نبقى سهرانين
تَ يختفي الديجور
ويعم جديدة النور
يبشّر بيوم جديد
فيهِ الطهارة عيد
يا الله شو مشتاق
قد الدني مشتاق
يا الله شو مشتاق
للصحوي عند الفجر
عا زغردة حسون
وصيحة ديوك الحي
وعا دقة المهباج
توعّي شباب الحَي
فيقوا يا ناس قوموا
قوموا وقولوا خَيْ
وقدموا ايات الشكر
لَ ربكم الخلاق…
يا الله شو مشتاق
حنا حبيب فرحة
إعادة … إعادة … إعادة
8/2/2026
يا الله شو مشتاق
From Facebook