وديع الصافي…!
كنت أعمل في دبي عام 2004 عندما علمت ان وديع الصافي جاء الى دبي لإحياء حفلة غنائية هناك … فكتبت له هذه القصيدة -الحوار -آملا ان يغنيها مع المطرب معين شريف، لكن للأسف لم أتمكن من الإجتماع به … واليكم كلمات القصيدة الموجهة "لإبنه"مروان الذي رجع بعد غياب دام سنين ليعيش في كنف "الوديع" كالطفل الوديع…
وديع : مين هيدا العم بدق الباب؟
قولكم رجع من بعد طول غياب
قولكم رجع مروان؟
هالشب الكان حيران
وكنت افتكرو ولد جهلان؟
قولكم رجع مروان؟؟
مروان : بيّي يا بيّي حزرت انا مروان
رجعت بعد غياب
طال عن لبنان
رجعت بعد غياب طال سنين
تَ قبّل ترابو
وديّاتك الحلوين
العرفو كيف يربو
وكمّل مع الإخوان…
تأخّرت؟ ايه تأخرت يا بيّي
تأخرت لو بتشوف
قديشني مقهور
قديشني زعلان
آخ لو تعرف يا بيّي آخ
قديش انا مشتاق
مشتاق … ابه مشتاق
للهيصة للمعدور
للكرْم للعنبات
لعيطة الناطور
للحقلي للزهرات
للصاج … للتنور
للمرج للزهرات
للفل للتنور
لمنجيرة الراعي اللّها عنّات
للضيعة والعجقات…
مشتاق … شو مشتاق يا بيّي
وديع :
رجعت يا مروان عند أهلك
للي تركتهم تتسير عَ دربك
تسعى ورا علمك
تفتش على رزقك…
يومها تركت … وبقيت انا عتبان
وما قدرت كلمة لوم وجّهلك
وبعد ما كبرت … رجعت
وحكمة الدهر فهمت
وبيّك بآخر عمرو يندهلك
قرّب علي مشتاق لَ ضمّك
وعوّض ع هالسنين الما راحت هيك
لعوّضت انتْ فيها تعب بيّك…
بتذكر قبل ما سافرت قلتلك
توعّى توعّى شوَيْ يا مروان
خليك مع أهلك ولا تهلك
وسافرت ما ردت وقّف بدربك
علمك أهم من عاطفة بيّك
وبعد ما طال الغياب
عدت قلتلك
إرجع لعند إمك
وبيّك الصار ختيار
إرجعلو لَ بيّك
وسمعت هالكلمي
وهللأ إنِتْ جنبي
قرّب عليّْ مشتاق لَ ضمك
قرّب علي مشتاق لشمك
الله يرضي عليك يا مروان
الله يرضى عليك يا إبني…
مروان :
عدت يا بيّي ولو بتشوف
قدشني مبسوط … قديشني فرحان
أمضي أحلى العمر بِ ظلك
بيّ] يا بيّي منك الغفران
السنين المضت تتعوض بقربك
باقي معك … باقي العمر كلو
أتبع خطاك واتدفّا بِ حضنك
الله يخليلي ياك يا بيّي
وعمر امي يطول مع عمرك…
دبي واحد أيار 2004
حنا حبيب فرحة
2/6/2025
وديع الصافي
From Facebook