"هدية … لأمي بعيد الامهات"…
من أجمل ما قرأت بعيد الام قصيدة "هدية لأمي بعيد الامهات"للأديب المناضل فؤاد الشمالي- حفيد المرحوم سليم مسلم - جديدة مرجعيون، أنقلها اليكم من كتابه "في بحر الموت". الذي أهداني اياه إبن عمي سمير فرحة قبل وفاته … وفي صدر الصفحة ملاحظة كتبها سمير بقلم رصاص تعليقا على القصيدة قال: قرأها لي فؤاد الشمالي عام 1957 يوم عيد الام، وكنا جالسين في مقهى في طرابلس، وكان الشاعر طلال حيدر معنا."
واليكم القصيدة
محتار … شو بجبلك تأهديكي عالعيد
يا غنيتي وعيدي
ان جيت جبلك قد ما بدي
الدني ما بتكفي
ون جيت جبلك قد ما عندي
يا خجلتي منك…
يا ميمتي…
يا ضيعتي اللي عاشقا البلبل
وللريح مهجورة
عا تمها زهر الربيع كوام
بتتضحّك … وبالقلب مقهورة
يا ميمتي
يا نبع ما بشح
يا بيادري لمكدّسي
يا غلتي … يا مواسمي
يا كرمة الجنّي
يا مية عيوني
لو كان فيّي
لملم نجوم السما كلن وما خلّي
ولا نجم لاطي بعب شي غيمي
وصفلك ياهن سوارة لدياتك
لو كان فيي
جمّع خيوط القمر كلن
واجدلّك ياهن
شريطة لشيباتك
لو كان فيي
حوّش من الصبح بسماتو
وطرّزلك ياهن
شي شال لكتافك
لو كان فيي جيب من دم الشفق
شي لون لشفافك…
لكن يا امي
افقر من الليل إبنك
واغنى من نجومو
عندو قصيدة حب … شو حلوي
كبرت على همومو
ربيَت على جوعو
رح يهدم ضلوعو
وبفرفطا بدربك
ولو خيّروني … بين اموال الدني كلا
وشي غفوي … وابكي على صدرك
بعيف الدني…
ما ببدلا بتكّي
ما ببدلا بنسرة ظفر إجرك…
تحية لروحك الحلوي يا فؤاد … اشتقنالك
حنا حبيب فرحة
1/4/2025
هدية … لأمي بعيد الامهات
From Facebook