كلمة العبقري الكبير الأستاذ عاصي الرحباني يوم رحيل الفنان نصري شمس الدين في 18 آذار 1983
نصري بدّي احكي معك باللغة البسيطة اللي بيعيش فيها الناس وبينوجدوا وبيموتوا، باللغة اللي كنت تواجه فيها الجماهير من بيروت الى بعلبك، للعواصم العربية وكل عواصم العالم. 30 سنة نحنا ويّاك شغل وسهر، 30 سنة وقوف عالمسارح مجد وتصفيق ولا يوم فشلنا وانت اللي كانت ولادتك عالمسرح يوم اللي بدّك تموت واخترت موتك عالمسرح وعلّمتنا اعظم استشهاد من اجل الحياة. يا رفقة الأيام الحلوي يللي سافرت بأول الربيع لمّا جينا لنودعك وكانت تلال جون شعلانة بالزهر الأبيض عاملتلك مهرجان عم تحاول تردلّك شوي من مهرجاناتك. كلنا بكينا وبكيت معنا السما. انت بتعرف الروابط اللي بيناتنا، انت صوتنا اللي كان يوصلنا للناس، نحنا جذور الشجرة اللي بالتراب وانت غصونا اللي عم تلمع بالشمس، انت الهدير اللي كان يوزّع ثورتنا ويزرعها بالدنيا. مطرح ما كنت تروح كنت تشك علم لبنان، زعيم!! نعم وأكتر من زعيم، انت من زعما لبنان الحقيقيين، صوتك وصل اكتر من اصواتن، فعل بالناس اكتر من خطاباتن، غيّر اكتر ما هني غيّروا. انت مش بحاجة لمين يكرمك، الوطن كرّمك بحياتك، انو شو الوطن هالتراث والطموحات اللي حاملينا بصدورنا، انّو شو الوطن انت وأنا وهالناس الطيبين اللي كانوا يزحفوا بالألوف ليسمعوك، هودي الوطن. يا سيد الوقفة العظيمة ما اجا أنبل منك عالمسرح، ولمّا طلّيت بفخرالدين فعلاً كنت انت فخرالدين، هوي لعب دور ونام بالتاريخ 200 سنة نام حتى جيت انت وعّيتوا وعيّشتوا معنا، شفناه بعينينا ولمسناه بايدينا وصار يطل علينا كل يوم بصوتك ويخبّرنا كيف بعمّروا الأوطان. الله يرحمك يا نصري رح تضل عايش بقلوب الناس وصوتك يهدر بكل الدنيا…
عاصي الرحباني
كلمة العبقري الكبير الأستاذ عاصي الرحباني يوم رحيل الفنان نصري شمس الدين في 18 آذار 1983
From Facebook