حديثُ وسادة…!
ولادتي على السلّم…
-" تعود ذكرى هذه الحادثة قوية مع آلام كل فصح-"
أنا جنوبي خلِقت عالسلّم
امي الْحَملتني برحِمها تسع شهور
من دون ما تتألم…
هيك كانْت ِ تقول…
هناك يوم بآذار بمرجعيون
الناس عم يتحضروا للعيد
عيد الآلام والفصح المجيد
امي وهيْ عم تعزّل الدار
شافت على القزاز شويْة غبار
حطّت السلّم تا تطلع تنظفو
وبس حطت إجرها عالدرجة الأولى
نزل راسي وكان حظي كبير ما تكسّر
وبعدين بعد ما عشت وكبرت
وشفت هالعالم قرفت ومرضت
وركضت عند امي وقلتلا
دخلِك شو هالعالم الجبتيني عليه
كلو فساد وكذب. إجرام، سرقة ونهب
دخلِك رجعيني محل ما خلقت…!
تطلّعت امي فيّي وقالتلي
لو بعدك زغير يا إبني كنت جرّبت
بس هللأ تأخّرت
وتوقف الحديث هون لأنو الرب
أخذ امي لعندو … وبقيت انا بهالدنيا
ضايع. عمفتّش عا طريقة
كمّل فيها الدرب…
حنا حبيب فرحة
فصح عام 2024 … وكل عام وانتم جميعاً ولبنان وفلسطين بالف خير
حديثُ وسادة…!
From Facebook