"جيران"… للشاعر الكبير ميشال طراد…!
انا وواقف عم أتامل بمكتبتي، لشوف اي كتاب رح أقرا اليوم، ناداني "ميشال طراد" وقال خوذ "هالدولاب"وإطلع لعند الجارة وقرالها قصيدة "جيران…"
طلعت وقريتلها القصيدة وسألتها: كيف لاقيتيها؟ قالتلي :"حضرتو بيحكي عن جيران زمان … هضول فلّو من زمان … شيل لكتاب … شيلو من وجّي…"
انا متأكد رح تعجبكم…
نسماتنا بِصيفو بجرودكم
وبتسرّحو جدياتكن بِغابنا
ونحلاتنا بيتغامَزو ع ورودكم
وعمننشر ع فرد شمس تيابنا
وع فجرنا بتلوحو عنقودكم
ومعتّقين نبيدكم بجرارنا
وغيماتنا فيّو فوق قرميدكم
وياسمينتكن ع فسحة دارنا
ورغيفنا مِنقَمْرو عَ صاجكن
وتحطبو ويضحكلكن ريحانَّا
وطفلنا يْطَعمي العشا لدجاجكن
وبنتكن تسقي الهنا صيصانّا
وبرموش عينينا نلَمْلِم دمعكن
وإنتو تدفّو عيونكن بخدودنا
وِزرعنا الأخضر عَ مية بنعكن
وجدودكن أصحاب هِنْ وِجدودنا
وعَمِنضَوّي سراجنا من زيتكن
وشقّيقكن طالع حْوالا صخورنا
وشحرورنا معشّش بطاقة بيتكن
وتَكْتَك حَجلكن جاوَبو شحرورنا…
"دولاب"-اول طبعا، نيسان 1957
منشورات دار الكتاب اللبناني
الله يا ميشال ما أروعك … الرحمة على روحك الغالية
حنا حبيب فرحة
16/11/2023
"جيران"… للشاعر الكبير ميشال طراد…!
From Facebook